Արհեստագործական լաբորատորիաներ

ART Laboratory

Արարելու իրավունքի տարածքը

Եթե Concept Store-ը այն վայրն է, որտեղ Գյումրիի ստեղծարարությունը հանդիպում է շուկային, ապա ART Laboratory-ն այն միջավայրն է, որտեղ այդ ստեղծարարությունը ծնվում է։

Սա պարզապես արտադրամաս չէ։ Սա տարածք է, որտեղ Շիրակի ստեղծող մարդիկ կարող են աշխատել, փորձարկել, սովորել, սխալվել, նորից սկսել, շփվել իրար հետ, հանդիպել նյութին և սեփական ձեռքերով նոր արժեք ստեղծել։

ART Laboratory-ի գաղափարական հիմքը կապվում է Բագրատունյաց շրջանի հետ, երբ արհեստը միայն մասնագիտություն չէր․ այն ինքնության լեզու էր։ Քարը, մետաղը, թելը, կավը, զարդանախշը և կառուցվածքը խոսում էին ժողովրդի ճաշակի, ներկայության և այս հողին պատկանելու իրավունքի մասին։

GCIC-ի ընդհանուր պատմության մեջ Բագրատունյաց Շիրակը հենց այդ շերտն է՝ ժամանակ, երբ արհեստը, նյութը և ձևը դառնում էին քաղաքակրթական ինքնության արտահայտություն։

ART Laboratory-ն այդ գաղափարը տեղափոխում է մերօրյա Գյումրի։

Այստեղ ստեղծող մարդը չի սպասում, որ ինչ-որ մեկը իրեն հնարավորություն տա։ Նա մտնում է մի տարածք, որտեղ հնարավորությունն արդեն կա։ Գործիքը հասանելի է։ Նյութը՝ շոշափելի։ Համայնքը՝ կենդանի։ Իսկ ստեղծագործական աշխատանքը դադարում է լինել միայն անհատական զբաղմունք և դառնում է գործընթաց, որը ստեղծում է նաև համայնքային և տնտեսական արժեք։

ART Laboratory-ն աշխատելու է չորս հիմնական ուղղությամբ։

01. ART Coworking

Շիրակի ստեղծողների բաց լաբորատորիան

ART Coworking-ը GCIC-ի ամենաբաց և ամենահամայնքային շերտն է։ Այն նախատեսված է Շիրակի ստեղծագործողների, սկսնակ վարպետների, դիզայներների, արվեստագետների, արհեստավորների և փորձարարների համար՝ մարդկանց, ովքեր ունեն գաղափար, ձեռքի հմտություն կամ պարզապես սովորելու ցանկություն, բայց հաճախ չունեն տարածք, գործիքներ, սարքավորումներ կամ ստեղծարար միջավայր՝ սկսելու համար։

Անդամակցության վճարը կլինի խորհրդանշական՝ ամսական 2,000 դրամ։ Այն հնարավորություն կտա օգտվել GCIC-ի ամրագրման համակարգից․ անդամը կկարողանա ընտրել իրեն հարմար օրը, ամրագրել անհրաժեշտ ժամային հատվածը և գալ լաբորատորիա՝ օգտագործելու այն հնարավորությունները, որոնք իրեն պետք են։

Այստեղ հնարավոր կլինի աշխատել կարի մեքենաների հետ, թրծել կերամիկական աշխատանքներ ընդհանուր վառարանում, փորձարկել թաֆթինգ, աշխատել հումքի և նյութերի հետ կամ պարզապես ժամանակ անցկացնել արվեստագետների համար նախատեսված սենյակում՝ մտածելու, խոսելու, ոգեշնչվելու և ստեղծարար միջավայրի մաս դառնալու համար։

Բայց այս տարածքի արժեքը միայն սարքավորումների հասանելիությունը չէ։ Իրական արժեքն այն է, որ ստեղծող մարդն այլևս մենակ չէ։

Նա գալիս է մի վայր, որտեղ իր կողքին մեկը կարում է, մյուսը կավ է ձևավորում, երրորդը գորգի կամ թելի հետ է աշխատում, չորրորդը պարզապես նստած մտածում է իր հաջորդ աշխատանքի մասին։ Այդ միջավայրում ստեղծագործությունը դառնում է վարակիչ։ Մարդիկ սովորում են իրարից, հետևում են իրար աշխատանքի ընթացքին, խորհուրդ են հարցնում, մտքեր են փոխանակում և աստիճանաբար ձևավորում նոր ստեղծարար համայնք։

Բագրատունյաց շերտի հետ կապն այստեղ շատ խորն է։ Ինչպես միջնադարյան արհեստանոցում գիտելիքը փոխանցվում էր ձեռքից ձեռք, փորձից փորձ, վարպետից աշակերտ, այնպես էլ ART Coworking-ը վերակենդանացնում է փոխանցման այդ սկզբունքը՝ առանց այն թանգարանային դարձնելու։

Այստեղ հին արհեստը չի ցուցադրվում որպես անցյալի նմուշ։ Այստեղ ձևավորվում է նոր արհեստային մշակույթ։

ART Coworking-ը Շիրակի յուրաքանչյուր ստեղծողի ասում է․

Դու պարտադիր չէ ունենաս սեփական արտադրամաս՝ սկսելու համար։
Դու պարտադիր չէ ունենաս թանկ սարքավորումներ՝ փորձելու համար։
Դու պարտադիր չէ մենակ մնաս քո գաղափարի հետ։
Քո արարելու իրավունքը կարող է սկսել հենց այստեղից։

02. GCIC Originals արտադրություն

Լաբորատորիայից մինչև ցուցափեղկ

ART Laboratory-ի երկրորդ կարևոր ուղղությունը GCIC-ի սեփական արտադրական գիծն է։

Եթե ART Coworking-ը բաց է համայնքի համար, ապա այս շերտը կենտրոնի պրոֆեսիոնալ արտադրական միջուկն է։ Այստեղ են ստեղծվելու այն ապրանքները, որոնք դառնալու են Concept Store-ի հիմնական տեսականու կարևոր մասը՝ GCIC Originals հավաքածուն։

Այդ հավաքածուն կարող է ներառել կերամիկական իրեր, տեքստիլ արտադրանք, թաֆթինգով ստեղծված գորգեր և դեկորատիվ օբյեկտներ, տան դիզայնի իրեր, կրվող ապրանքներ, փոքրաքանակ նվերային հավաքածուներ և այլ արտադրանքներ, որոնք ծնվում են հենց կենտրոնի ներսում։

Այս մոդելը կարևոր է, որովհետև GCIC-ը չի սահմանափակվում միայն կրթությամբ կամ մշակութային ծրագրերով։ Այն կառուցում է ամբողջական շղթա՝ գաղափարից մինչև արտադրանք, արտադրանքից մինչև վաճառք, վաճառքից մինչև կայուն եկամուտ։

Լաբորատորիայում ստեղծված իրը տեղափոխվում է խանութ։ Խանութում այն հանդիպում է այցելուի, գնորդի, հյուրանոցի դիզայների, ռեստորանի սեփականատիրոջ, կորպորատիվ պատվիրատուի կամ միջազգային գործընկերոջ։ Վաճառքից ստացված ռեսուրսը վերադառնում է լաբորատորիա, և արտադրությունը շարունակվում է։

Այսպիսով ART Laboratory-ն դառնում է GCIC-ի տնտեսական շարժիչներից մեկը։

Այստեղ ևս Բագրատունյաց տրամաբանությունը կարևոր է։ Այդ շրջանում արհեստը միայն գեղեցկության ստեղծում չէր․ այն համակարգ էր՝ պատվեր, նյութի կազմակերպում, կառուցում, արժեքի ստեղծում։ ART Laboratory-ն այդ սկզբունքը տեղափոխում է ներկա՝ ցույց տալով, որ ստեղծարար աշխատանքը պետք է ունենա ոչ միայն գաղափարական իմաստ, այլ նաև տնտեսական շարունակականություն։

GCIC-ի սեփական արտադրանքը պետք է ապացուցի, որ տեղական ստեղծարար աշխատանքը կարող է լինել որակյալ, մրցունակ, վաճառվող և ցանկալի։

Ոչ որպես հուշանվեր։
Ոչ որպես բարեգործական համակրանքով գնվող արտադրանք։
Այլ որպես ժամանակակից դիզայն՝ իրական շուկայական արժեքով։

03. Վարպետության դասեր

Փորձառություն, որտեղ այցելուն ստեղծում է իր ձեռքերով

ART Laboratory-ի երրորդ ուղղությունը վճարովի վարպետության դասերն են։

Դրանք նախատեսված են ինչպես տեղացիների, այնպես էլ զբոսաշրջիկների, երեխաների, ընտանիքների, թիմերի, կորպորատիվ խմբերի և բոլոր նրանց համար, ովքեր ուզում են ունենալ իրական ստեղծարար փորձառություն։ Այստեղ այցելուն պարզապես չի դիտում, թե ինչպես է ստեղծվում առարկան․ նա մտնում է այդ գործընթացի մեջ։

Մասնակիցը կարող է աշխատել կավի հետ, ստեղծել փոքր թաֆթինգ աշխատանք, պատրաստել տեքստիլ օբյեկտ, վերաիմաստավորել ավանդական զարդանախշը, ձևավորել փոքր դիզայներական իր կամ մասնակցել թեմատիկ ստեղծարար փորձառության։

Այս վարպետության դասերի արժեքը միայն «ինչ-որ բան պատրաստելու» մեջ չէ։ Իրական արժեքն այն է, որ մարդն իր ձեռքերով կապ է հաստատում մի ավանդույթի հետ, որը մինչ այդ կարող էր տեսնել միայն ապակու հետևում, գրքում, թանգարանում կամ ուրիշի պատրաստի աշխատանքի մեջ։

GCIC-ի ընդհանուր գաղափարը՝ «ձեռքեր, որոնք հիշում են», այստեղ դառնում է ապրած փորձառություն։ Այցելուն իր ձեռքերում զգում է նյութը, հասկանում աշխատանքի բարդությունը և տեսնում, որ յուրաքանչյուր առարկա պատահաբար չի ծնվում։ Այն պահանջում է ժամանակ, կենտրոնացում, շարժում, զգայունություն և հարգանք նյութի հանդեպ։

Վարպետության դասերը կարող են դառնալ նաև GCIC-ի կարևոր եկամտային ուղղություններից մեկը։ Դրանք միաժամանակ ստեղծում են փորձառություն, կրթական արժեք, զբոսաշրջային գրավչություն և ավելի խոր էմոցիոնալ կապ արտադրանքի հետ։

Մարդը, ով իր ձեռքերով կավ է ձևավորել կամ գորգի մի փոքր հատված է գործել, այլևս երբեք նույն կերպ չի նայի կերամիկային կամ տեքստիլ արտադրանքին խանութում։ Նա արդեն հասկանում է այդ աշխատանքի արժեքը։

04. Կրթական ծրագրեր

Հմտությունից դեպի մասնագիտություն

ART Laboratory-ի չորրորդ ուղղությունը վճարովի կրթական ծրագրերն են։

Եթե վարպետության դասը կարճ փորձառություն է, ապա կրթական ծրագիրը ավելի խոր ճանապարհ է։ Այն նախատեսված է մարդկանց համար, ովքեր ուզում են ոչ միայն փորձել, այլ սովորել։ Ոչ թե մեկ օր անցկացնել լաբորատորիայում, այլ ձեռք բերել իրական հմտություն, որը կարող է դառնալ մասնագիտություն, եկամտի աղբյուր կամ ստեղծարար աճի հիմք։

Կրթական ծրագրերը կարող են ընդգրկել կերամիկա, կար և տեքստիլ աշխատանք, թաֆթինգ, արտադրանքի դիզայն, փաթեթավորում, փոքր բրենդի ձևավորում, արտադրանքի լուսանկարում, վաճառքի նախապատրաստում և այն բոլոր հմտությունները, որոնք անհրաժեշտ են գաղափարը շուկա հասցնելու համար։

Այս ուղղության մեջ ամենակարևորն այն է, որ GCIC-ը մարդուն պարզապես գործիք չի տալիս։ Այն սովորեցնում է, թե ինչպես այդ գործիքը վերածել մասնագիտական հնարավորության։

Մարդը կարող է գալ պարզապես հետաքրքրությունից, դառնալ համայնքի անդամ, օգտվել coworking-ից, միանալ դասընթացի, ստեղծել իր առաջին արտադրանքը, փորձարկել, զարգացնել այն և ի վերջո հայտնվել Concept Store-ում կամ դառնալ GCIC-ի համատեղ արտադրանքի համահեղինակ։

Այսպիսով ART Laboratory-ն ձևավորում է հստակ զարգացման ճանապարհ․

հետաքրքրություն → հասանելիություն → փորձառություն → հմտություն → արտադրանք → շուկա

Սա հատկապես կարևոր է Շիրակի համար, որտեղ շատ ստեղծարար մարդիկ իրական ներուժ ունեն, բայց հաճախ չունեն համակարգ, որը կօգնի այդ ներուժը վերածել կայուն աշխատանքի։

ART Laboratory-ն հենց այդ բացակայող համակարգն է։